غیر رسمی تعلیم جہدا دائرہ کار ریڈیو ، ٹیلیویژن تے اخباراں توں ودھ کے سوشل میڈیا تک وسیع ہوگیا اے،کدے بڑا ای محدود سی۔ پنڈاں تھانواں وچ غیر رسمی تعلیم دے تن وڈے مرکز سن۔ پہلا مرکز مسجد سی جتھے مولوی صاحب پنڈ آلیاں نوں جمعے دے خطبیاں راہیں  دین دی سوجھ بوجھ دیندے تے بالاں نوں روزانہ فجر ویلے ناظرہ قرآن پڑھاندے سن۔ دوجا مرکز چوپال سی جتھے قصے کہانیاں، داستاناں تے باہمی مشورے راہیں اخلاقی تربیت دا سربندھ کیتا جاندا سی۔ تیجا مرکز پنچائت سی جہدے فیصلیاں نوں مکھ مڈھ رکھ کےچنگے تے ماڑے دا نکھیڑا کیتا جاندا سی۔دیہاتی وسیب وچ پنگرن والی نویں پود دی تعلیم و تربیت دا وڈا ذریعہ وڈیریاں دا  قول تے فعل سی۔

ایہہ لکھت  توسی لکھاری دی آواز وچ سن  وی سکدے او

رسمی تعلیم دا ذریعہ مدرسے تے خانقاہواں سن۔شریعت دے شیدائی مدرسیاں دا رخ کردے تے طریقت دے طالب خانقاہواں دے وسنیک بندے۔ مدرسیاں توں مُنڈے عالم فاضل بن کے نکلدے جد کہ خانقاہواں توں صوفی درویش بن کے۔ایہ مدرسے تے خانقاہواں وی ٹانویں ٹانویں قصبیاں وچ ای موجود سن فیر وی لوکاں وچ تہزیبی،تمدنی تے معاشرتی رہتل بہتل دی سوجھ بوجھ کُٹ کُٹ کے بھری  ہوئی سی،جیہدی وڈی وجہ رسم و رواج تے پرم پرا دی پالنا کرنا سی جنھاں نوں دیہاتی ایمان دا درجہ دیندے سن۔

 

لارڈ میکالے دے نظام تعلیم دے  تحت پنگرن والا بابو طبقہ جنھوں انگریزی زبان تے بول چال نال واقفیت دی بنیاد تے اُچا درجہ دتا گیا۔ایسے طبقے وچوں بیوروکریٹس پیدا ہوئے ۔          (I.C.S) نڈین سول سروسز دا امتحان پاس کرن والے امیدواراں وچوں ورلے ایسے سن جنھاں نوں انگریزی زبان دے نال نال اپنے دین تے معاشرت دا وی علم سی۔ اتے ایہ صورتحال اج ہور وی بروہبی ہو چکی اے۔ انگریزی زبان دا شملا اچا کرن والے ادارے اج وی ساڈے ملک وچ موجود نیں جتھے انگریزی بول چال نوں ای علمیت دا معیار سمجھیا جاندا اے تے ایہناں اداریاں وچ پڑھن والے وی اپنے دین تے معاشرت توں ناواقف نیں۔

اج دے دور وچ رسمی تے غیر رسمی تعلیم دے مواقع بہت ودھ گئے نیں۔ رسمی تعلیم لئی یونیورسٹیاں دا جمعہ بزار تے لگ گیا اے پر ایہناں دییاں products وی ناقص نیں تے price control دا وی بحران اے۔غیر رسمی تعلیم وچ سوشل میڈیا سب توں بے مہارا اے جنھیں سلجھائو دی بجائے الجھائو نوں بڑھوتی دتی اے۔

اج دے جدید دور وچ رسمی تے غیر رسمی دونواں ذرائع لئی ایسے اصول ضابطے تے قاعدے قانون بنان دی لوڑ اے جنھاں دے لاگو ہون توں بعد یونیورسٹیاں توں فارغ التحصیل واقعی اپنے شعبے دے نمائندہ لوک ہون  اتے سوشل میڈیا توں پیدا ہون والا فساد تے شر اخلاص تے خیر وچ بدل جائے۔